13 мая 2021 г.
Кĕçĕн Шетмĕ ял тăрăхне кĕрекен Яманакра Тăван çĕршывăн Аслă вăрçине Çĕнтерÿпе вĕçленĕренпе 76 çул çитнине халалласа мини-футбол турнирĕ ирттернĕ.
Футболистсем «Виçĕ ялăн Çĕнтерÿ Кубокне» çĕнсе илессишĕн тупăшнă. Турнирта «Юниор» /Мăн Шетмĕ/, «What is love» /Муркаш/, «Çирĕклĕ», «Ешкилт» тата «Яманак» командăсем тупăшнă. Вăйăсем çивĕч кĕрешÿре иртнĕ. «Яманак», «Ешкилт» тата «Çирĕклĕ» командăсем малти вырăнсене йышăннă. «Чи лайăх хапхаçă» ята — Дмитрий Сорокин /«Яманак»/, «Чи лайăх хÿтĕлевçĕ» ята — Василий Филиппов /«Çирĕклĕ»/, «Чи лайăх вылякан» ята — Валерий Трофимов /«Ешкилт»/, «Чи лайăх тапăнса вылякан» ята Николай Львов /«Яманак»/ тивĕçнĕ. Çĕнтерÿçĕсене парнесемпе хавхалантарнă.
Сергей САМСОНОВ.