22 апреля 2021 г.
Тунтикун районти ачасемпе çамрăксен спорт шкулĕн стадионĕнче çăмăл атлетика енĕпе Трак ен кубокне çĕнсе илессишĕн ăмăртусем иртнĕ.
Тупăшусене хамăр тăрăхра çăмăл атлетикăна аталантарас, физкультурăпа спорта юратма вĕрентес, хĕрсемпе каччăсен сывлăхне çирĕплетес, çăмăл атлетика енĕпе Чăваш Ен Кубокĕн ăмăртăвĕсем валли вăйлă спортсменсем тупса палăртас тĕллевпе йĕркелеççĕ. Спортсменсене райадминистраци пуçлăхĕ ячĕпе социаллă аталану тата архив ĕçĕн пайĕн ертÿçи Рена Осипова саламланă. «Сире ăмăртусенче хастарлăх, ăнăçу сунатăп», — палăртнă Рена Михайловна.
Ăмăртусене Трак енри шкулсен командисем хутшăннă.
Сергей ПЕТРОВ.