19 ноября 2019 г.
Красноармейски вăтам шкулĕнче чăвашсен паллă поэчĕ Çеçпĕл Мишши (Михаил Кузьмин) çуралнăранпа 120 çул çитнине халалласа "Çеçпĕл урокĕсем" иртеççĕ. Пиллĕкмĕш "б" класра вĕренекенсем М.К. Кузьмин поэт амăшĕн Агафия Николаевăн пурнăçĕпе паллашрĕç, район хаçачĕн кăçалхи 82-мĕш номерĕнче районти историпе таврапĕлỹ халăх музейĕн ертỹçи В. Тихонова çырса пичетленĕ "Çеçпĕл Мишши Шывпуç Чуракасси ялĕнчен" статьяпа паллашрĕç. Тăххăрмĕшсемпе пиллĕкмĕш "а" класра вĕренекенсем патĕнче хăнара район вулавăшĕн библиотекарĕ С.А. Гурьева пулчĕ. Вăл хăй хатĕрленĕ "Çеçпĕл Мишши, поэт пурнăçĕпе шăпа сасси" медиапрезентаци кăтартрĕ, поэт кун-çулĕн кăсăклă саманчĕсем çинчен каласа пачĕ, библиографипе паллаштарчĕ. Саккăрмĕш "б", улттăмĕш "а" тата "б" классенче вĕренекенсем В.М. Михайловпа З.П. Михайлова вĕрентекенсем хатĕрленĕ "Çеçпĕл Мишшин ачалăхĕ, шухăш-ĕмĕчĕ, ĕçĕ-хĕлĕ, пултарулăхĕ" тата "Çеçпĕл — чăваш поэзийĕн пирвайхи чечекĕ" медиапрезентацисене пăхрĕç, поэт пурнăçĕпе ĕçĕ-хĕлĕ çинчен пичетленĕ кĕнекесен куравĕпе паллашрĕç. Кунсăр пуçне шкул ачисем çывхаракан Аннесен кунне халалласа хăйсен сăвă çырас ăсталăхне тĕрĕслесе пăхрĕç. Уроксене чăваш чĕлхипе литератури вĕрентекенсем В.М. Михайлов, З.П. Михайлова, Э.В. Чаховская ертсе пычĕç. В. Михайлов.