18 января 2019 г.
Çĕнĕ 2019 çулта Мендельсон маршĕ пĕрремĕш хут Елена Станиславовна Герасимова тата Николай Рудольфович Тельман ячĕпе янăрарĕ. Çапла Трак енре çĕнĕ çемье çуралчĕ. Мăшăрлану кунĕ — икĕ çамрăк чĕрешĕн савăнăçлă, çав вăхăтрах хумхануллă тапхăр. Çак кунтан мăшăр хăйĕн малашлăхне палăртать, вĕсем алла-аллăн тытăнса пурнăçăн вăрăм сукмакĕпе пĕрле утма, яваплăха туйма, ăнăçушăн савăнма, ачасем çитĕнтерме, йывăрлăхсене пайлама сăмах параççĕ. ЗАГС пайĕн ĕçченĕсем телейлĕ мăшăра çирĕп сывлăх, тулли ăраскал, нумай-нумай çул пурăнма килĕшỹпе юрату сунчĕç. Красноармейскинчи Мефодьевсем, “Трак ен — кедр тăрăхĕ” проект авторĕсем, кедр хунавĕсем лартма сертификат пачĕç.