15 августа 2017 г.
.jpg "Ертỹçĕсем — А. Н. Игнатьев ХФХ-ĕнче")
Хаçатра хуçалăхсен ертỹçисен вырма умĕнхи канашлăвĕ иртни, пленарлă пай хыççăн вĕсем А. Н. Игнатьев хресчен фермер хуçалăхĕнче пулса курни çинчен пĕлтернĕччĕ ĕнтĕ. Паянхи номерте асăннă ХФХ ĕçĕ-хĕлĕпе тĕплĕнрех паллаштарăпăр. Хресчен фермер хуçалăхне А. Н. Игнатьев 2008 çулта йĕркеленĕ. Кăçал вăл çемье фермисене патшалăх енчен пулăшу кỹмелли конкурса хутшăннă, 7 млн та 400 пин тенкĕлĕх гранта тивĕçнĕ. Çак укçа-тенкĕпе хуçалăх ертỹçи 120 пуç ĕне вырнаçмалăх вите тума тата ăратлă пăрусем туянма ĕмĕтленет. Хальхи вăхăтра кунта мăйракаллă 30 пуç шултра выльăх усраççĕ, çав шутра — 12 ĕне. Ĕне выльăх йышне фермер 120 пуçа, çав шутра ĕнесенне 100 пуçа çитерме пăхать. Вĕсене ăнăçлă хĕл каçарма 55 тонна утă тата чĕркевсенче 160 тонна сенаж хатĕрленĕ. Сенажа хуçалăх иккĕмĕш çул ĕнтĕ чĕркевсенче янтăлать, çакна валли пĕлтĕр СLААS Рoland 240 фирмăн пресс-подборщикне тата чĕркемелли МАSСАР 2100 агрегат туяннă. Ку технологипе усă курни хуçалăха сенажа рулонсенче районта пĕрремĕш хатĕрлеме май панă (сенаж валли çулнă курăка стетч-пленкăпа чĕркенĕ). Çакна та палăртас килет. Фермер машинăпа трактор паркне пуянлатас тĕллевпе те ялан ĕçлет. Кăçалхи çурхи уй-хир ĕçĕсем умĕн, сăмахран, 1350 пин тенкĕ тăракан, 6 метр сарлакăш илекен çĕнĕ Быстрица С-6ПМЗ сеялка туянчĕ. А. Н. Игнатьев ХФХ-ĕ 640 гектар çĕрпе усă курать, çав шутра пĕрчĕллĕ культурăсем — 425 гектар: кĕрхи тулă — 25, çурхи тулăпа урпа — 200-шер. Унсăр пуçне 35 гектар нумай çул ỹсекен курăксем йышăнаççĕ. Ытти — хура пусă. Хуçалăх кăçалхи ĕç çине те тĕплĕн хатĕрленсе кĕтсе илчĕ: çунтармалли-сĕрмелли япаласем çителĕклĕ, СLААS МЕGА 208 комбайн пĕтĕмĕшпех юсавлă, тырă складне хатĕрленĕ, тырă типĕтмелли куçса çỹрекен агрегат та пур. Кунта тырă йышăнса сортламалли процеса пĕтĕмпех механизациленĕ. Çак тĕллевпе фермер хăйĕн вăйĕпе йышăну бункерĕ ăсталанă, тырă унтан шнек витĕр циклон çине пырать, малалла пĕрремĕш тасатнă çĕре каять. Унтан вара нỹрĕклĕхне кура сушилкăна пырать е склада ăсанать.
В. Васильев.