05 декабря 2008 г.
РФ Президенчĕн 1998 çулхи Указĕпе пирĕн çĕр-шывра ноябрь уйăхĕн юлашки вырсарни кунĕнче Ача Амăшĕн кунне паллă тума йышăннă. Çавна шута илсе, чÿк уйăхĕн 30-мĕшĕнче “Асамат” ансамбль Шывпуçĕнчи кану çуртĕнче пысăк концерт кăтартрĕ.
Программăра “Тавах, анне”, “Асамат кĕперĕ” тата ытти нумай-нумай юрăсем янăрарĕç. Ансамбль членĕсем хăйсен ашшĕ-амăшĕсене пĕчченшерĕн те юрласа савăнтарчĕç. Тĕслĕхрен, Татьяна Михайлова — “Анне куçĕсем”, Анастасия Тимофеева — “Асанне тĕпелĕ”, Анастасия Васильева — “Кĕрхи пейзаж”, Анжелика Васильева “Анне, эсĕ манпа” юрăсене илемлĕн шăрантарчĕç. Çав каç кану çуртне пынисем ачасен концерчĕпе кăмăллă юлчĕç.