02 декабря 2008 г.
Пысăках мар Анаткасра виçĕ полковник. Пĕри — Прохор Трофимов çыравçă, теприсем — Волковсен йăхĕнчен.
Анаткасри Николай Иванович Волкова районта пĕлмен çын çук та пуль. Паллах, ватăраххисен йышĕнчен...
Сурăм лесничествин ĕçĕ-хĕлĕпе палăрнă унăн пурнăçĕ.
— Эпĕ пилĕк çул лесникре ĕçлерĕм. Ун хыççăн 13 çулне — техник-технологра, 14-шне — лесничие пулăшаканĕнче, — тет Николай Иванович. — Хам утмăл çул тултарсан та пĕр çул вăрмантан уйрăлмарăм.
Халь хăй 74 çул тултарса 75-е пуснă пулин те, вăрманçăн аса илмелли çине-çинех тупăнчĕ. Ĕçри тус-юлташĕсене аса илчĕ. Мĕн чухлĕ хыр-чăрăш, юман лартса чĕртмен пуль. Çав вăрман тăрăхĕсем халь каш! кашлаççĕ. Чăннипех те “Волков вăрманĕсем” тесе калассăм килет вĕсене.
— Эпĕ пĕтĕмпе 40 çул вăр-манти лесник пÿртĕнче пурăннă. Çемьепе паллах. Паян ялти — “Хусан” урамĕнчи кил-çуртра. Ĕлĕкрех, эпĕ астăвасса, çакăнта 16 кил пулнăччĕ. Халь мăрьерен тĕтĕм тухаканни çиччĕ кăна пур, — хăй кăмăлсăрланнине пытараймарĕ Николай Иванович. — Ял ватăлчĕ.
Мăшăрĕпе — Раиса Егоровнапа — пĕрлешнĕренпе кĕçех 50 çул çитет Волковсен. Пĕр хĕрпе ывăл тĕрĕс-тĕкел çуратса пăхса çитĕнтернĕ иккĕшĕ. Ачисемпе чăннипех те мухтанаççĕ. Уйрăмах ывăлĕпе — Геннадийпе.
— Вăл манăн — полковник.
Мари Эл республикин тĕп хулинче — Йошкар-Олара пĕр чаçĕн командирĕ. Шăллăм та — Геннадий — çĕр-шывăн пĕр хулинче çар училищинче ĕçлерĕ. Халь — тивĕçлĕ канура, — аса илчĕ Н. Волков. — Вăл та — полковник.
Апла пулсан, анаткассен мухтанмалли пурах.