28 ноября 2008 г.
Район администрацийĕн социаллă хÿтлĕх пайĕ сахал тупăшлă çемьесене 2008 çулхи ноябрьте хваттершĕн тата коммуналлă çăмăллăхсем илнĕшĕн тÿлеме субсиди парассине вĕçленĕ.
Кăçалхи чÿк уйăхĕнче 245 гражданина 141 пин тенкĕ субсиди тÿленĕ. Ноябрьте çак укçана илме 40 çын заявлени çырнă, вĕсенчен 3 гражданинĕн, вĕсен тупăшĕ пысăкрах пулнипе, ыйтăвне тивĕçтерме килĕшмен.
Районта граждансен ĕç укçи, пенсисемпе социаллă тÿлевсем ÿссе пыраççĕ. Çавăнпа та социаллă хÿтлĕх пайне пулăшу ыйтма килекенсен хисепĕ те чакрĕ. Çулталăк пуçланнăранпа граждансен 557 заявленине пăхса тухнă, 85-шне тивĕçтермен.
Карайпа Алманч, Красноармейскипе Кĕçĕн Шетмĕ, Чатукасси ял тăрăхĕсенчи хуçалăхсенчен пулăшу ыйтма килекенсем ытларах. Еншик Чуллă енчен вара — сахал. Ку мĕн çинчен калать-ха: е ку ял тăрăхĕнчи çынсен пурнăç шайĕ лайăхрах, е вĕсем субсиди пани пирки пĕлмеççĕ те.