25 ноября 2008 г.
Районти халăх пултарулăх çуртĕнче кашни эрнерех — шăмат кунсенче — çĕнĕ çемье чăмăртаннине регистрацилеççĕ. Кунта çамрăксем çĕнĕ йăла-йĕркепе çырăнаççĕ.
Акă, хальхинче — шăмат кун — ноябрĕн 22-мĕшĕнче керменте, кăнтăрла иртсен, умлăн-хыçлăнах икĕ çемье çырăнчĕ.
Савăнăçлă регистраци умĕн районти ЗАГС пайĕн ĕçченĕпе Эльвира Николаевна Антоновапа калаçса илтĕм.
— Халь Валерьян Витальевич Соленовпа Марина Сергеевна Петрова çырăнаççĕ. Иккĕшĕ те — Тусайран. Каччи — газ уçлакан Заволжски станцире, хĕр-упраçĕ “Ял пурнăçĕ” хаçат редакцийĕнче вăй хураççĕ.
Тепĕр мăшăрĕ — Пулайкассинчен — Татьяна Юрьевна Козловапа Иван Александрович Александров пĕр çемьене чăмăртанаççĕ, — терĕ Э. Антонова. — Кăçал вара ку таранччен районта 90 çемье хушăнчĕ.
Çапла вара иртнĕ шăмат кун икĕ çĕнĕ çемье пурнăç çулĕ çине тухрĕ. Такăр çул сире, Соленовсемпе Александровсем.