25 ноября 2008 г.
Алманчри пĕтĕмĕшле вăтам пĕлÿ паракан вăтам шкулти библиотека уçăлнăранпа — тăваттăмĕш çул. Вăл ял халăхĕшĕн те, вĕренекенсемшĕн те чи çывăх вырăн пулса тăчĕ. Ăна куллен хăтлăх кÿрекенĕ — Ольга Долгова библиотекарь. Кашниех кĕре-кĕре тухать кунта. Çĕнĕ хаçат-журнал вулать, ытти çăмăллăхсемпе усă курать.
Ольга Витальевна физкультурăпа спортпа та туслă. Вырăнта та, районта та волейболла выляссипе палăрать. Республика шайĕнче те Трак ен командишĕн вылять.
Ача-пăча библиотеки те шкултах. Унăн ĕçĕ-хĕлне Людмила Егорова йĕркелесе пырать. Тус-тантăшĕ пекех, аслă пĕлÿллĕ, И. Ульянов ячĕллĕ Чăваш патшалăх университетĕнче вĕреннĕ.
Библиотекăра вĕренекенсем çеç мар, аслисем те пулаççĕ. Ача-пăча литературипе пуян вăл.
Алманч шкулĕнчи библиотекăсенче вĕренекенсем тĕнче шайĕнчи информацие пĕлеççĕ. Ку тĕлĕшпе вĕсене компьютерсем пулăшаççĕ. Çакăнтах тĕслĕ телевизор та пур.
Вулавăш чăннипех те пĕлÿ çăл куçĕ — Алманра. Кĕрсе тухма ан манăр çеç.