21 ноября 2008 г.
Кил-çуртра кăштах кăштăр-татсан, яланхиллех урамри сак çине тухса вырнаçать Матрена Григорьевна Трофимова. Çамрăках мар вăл. Хăй каланă тăрăх, 92 çул çине пуснă. Çавах та тухса çÿрет, пасара кайса килет. Шăм-шака хускатни, паллах, сывлăхшăн усăллă.
Ĕлĕкрех районти çар комиссариачĕ пулнă çурта хирĕç, урам урлă ларать унăн йывăç кил-çурчĕ. Юнашарах — лавкка. Çывăхра вăл пурри те аван. Пенси укçи-тенкине апат-çимĕç валли тăккалать.
Мăшăрне — Тăван çĕр-шывăн Аслă вăрçин ветеранне, пĕрремĕш ушкăнри инвалида яланах ăш пиллĕн аса илет. Мĕн тăвăн, Максим Трофимович Трофимов 62-рех çĕре кĕчĕ.
Хăй çакнашкал кивĕ çуртра пурăннишĕн кăмăлсăр ватă. Халь, акă, пĕр пÿлĕмлĕ хваттер уйăрса панине пĕлтерчĕ. М. Трофимова сутуçăра, райсовет ĕçтăвкомĕнче ĕçленĕ.
Красноармейскинче пурăнакан ватă хаçат-журнал вулама та юратать. Хальлĕхе вăл “Ял пурнăçĕ”, “Хресчен сасси”, “Кил-çурт, хушма хуçалăх” хаçатсене çырăнса илет.
Максим Трофимовичпа виçĕ хĕр те икĕ ывăл çуратса пăхса çитĕнтернĕ. Мухтанать вĕсемпе, савăнать.
— Çук-ха, ватăлмастпăр, — тет Матрена кинемей, сывпуллашнă май.