14 ноября 2008 г.
Урам тăкăрлăкĕнче икĕ хĕрарăм сăмах çăмхине сÿтет. Калаçу çĕр улми пирки пырать-мĕн.
— Мухтанмалли çук кăçал манăн. Пĕр соткăран шăпах пĕр витре кăларса илтĕм. Тьфу! Вăл та пулин çĕрет! Çилĕм пекех çыпçăнать тата… — ывăс пек аллисемпе саркалать ватă. — Çĕр лаптăкĕ те асфальт пекех…
— Манăн та мăйăртан шултрах мар. Кивçене кайма тивет пуль. Мĕн тăвăпăр? — куçĕсене мăчлаттарать пĕчĕкрех çан-çурăмли. — Мĕн тăвăпăр?
— “Таябинкăна” е “Бахчана” кайăпăр. Çынсем кирлĕ теççĕ ĕçлеме, — хăй шухăшне пытараймарĕ ывăс пек сарлака алăлли.
— Кайăпăр. Вăй-хал пур чух хуçалăхсене пулăшар, — тăрст! тутарчĕ урисемпе пĕчĕкреххи.