11 ноября 2008 г.
Паян çил иртенпех каçса кайса вĕрет. Чарăнасшăн та мар. Çил чăрсăрланиччен пĕр касă çумăр çуса иртрĕ. Чашлаттарчĕ кăна. Çĕр улми кăларма тухнăскерсем хăвăртах пÿртелле тапса сикрĕмĕр.
— Эх, мăнтарăн çумăрĕ чарăнма та пĕлмест хăть. Канмалли куна лăпланасчĕ хăть, — тарăхнине пытараймарĕ мăшăр.
Аслă ывăл, алла кĕреçе тытнăскер, çенĕкрен пĕрехмай пралук еннелле пăхрĕ. Çумăрĕ кăнтăр енчен шĕпĕртетет те. Тата пирĕнтен кăнтăр енче Ванюшăн йывăç çурчĕ вырнаçнă.
— Тунсăхлать халь çав çурт. Ванюш çуккишĕн макăрать, — тăруках сăмах хушрĕ Сергей. — Вилĕмĕ пăркăчларĕ çав.
Ялтах пурăнатчĕ-ха вăл. Çемьерен ăнмарĕ ăна. Иккĕ те авланса пăхрĕ. Пĕри амăшĕ хисеплеменнипе уйрăлса кайрĕ. Тепри, упăшки пур çĕртех, юттисем çине куç хыврĕ. Картиш тулли выльăх-чĕрлĕх усранă Ванюш. Ĕне сунă. Çăкăр пĕçер-нĕ. Мăшкăла тÿсеймерĕ. Арăма хăваласа кăларса ячĕ. Кăçал аппăшĕ патĕнче çур çул пурăнчĕ. Аппăшĕ Чулхула облаçĕнчи пĕр районти ялта пурăнатчĕ. Час-часах чирлетчĕ Ванюш. Тен, çавăнпах та пуль, тăванĕ патĕнче хÿтлĕх тупрĕ. Çав хушăра кил-çуртне хам пăхрăм.
Çулла йăпăртлăха Пайсупин ялне килсе тухрĕ Ванюш. Тăван кĕтес хаклăрах-çке. Йăлтах йăвашланнăччĕ вăл. Сывлăш тухиччен килсе каяс тенĕ-ши?
Икĕ кун пулчĕ ялта. Туятăп-ха аран-аран сывлать хăй. Сыв-лăшĕ тухмасть, çине-çинех ÿсĕрет.
Пĕр кун мунча хутса кĕртрĕм. Аран-аран çăвăнкаларĕ мунчара. Сывлама та йывăр. Хырăмĕ усăнса аннă. Ах, çав тери хĕрхентĕм Ванюша.
— Ванюш, эсĕ çав тери йывăр чирлетĕн пулмалла. Мĕн пулнă-ха сана? — тесе ыйтасшăнччĕ эпĕ. — Мĕн кансĕрлентерет сана?
Виççĕмĕш кун Ванюша ăсатрăмăр. Питĕ кулянчăк сăн-питпе ларса кайрĕ вăл.
Тепĕр кун Чулхула тăрăхĕн-чен телефон шăнкăртатрĕ. Ванюшăн аппăшĕ — Лиза чăрмантарать-мĕн.
— Çăлаймарăмăр шăллăма. Васкавлă пулăшу машини çинчех сывлама пăрахрĕ. Организмра, шалта йăлтах пĕтнĕ вĕт. Больницăра çавна çирĕплетрĕç, — куççулĕпе чыхăна-чыхăна пĕлтерчĕ Лиза. — Питĕ шел…