11 ноября 2008 г.
Кайри Карăкра Иван Харитонов — хисеплĕ çын. Пĕтĕм кун-çулне тăван тăрăхпа çыхăнтарнă. Сысна ĕрчетекен “Шанс” предприятире, ФГУн “Чăваш мелиоводхоз” управленийĕн филиалĕнче вăй хунă вăл. Каярахпа “Сельэнерго” предприятире тăрăшса тивĕçлĕ канăва тухнă.
Иван Антонович — çут çанталăк тусĕ. Мăн Шетмĕ юхан шывĕ хĕррипе тĕрлĕрен йывăç: хырсемпе чăрăшсем, çăкасем, хурăнсем лартса хăварнă.
И. Харитонов район хаçачĕн тусĕ. Çулленех çырăнса илет ăна.
— “Ял пурнăçĕ” мана килĕшет. Юратса вулатăп. Çавăнпа та çулленех çырăнатăп, — тет Иван Антонович.
Мăшăрĕ — Зина — Красноармейскинчи пĕтĕмĕшле пĕлÿ паракан иккĕмĕш вăтам шкулта ĕçлет. Виçĕ ача: пĕр ывăл та икĕ хĕр çуратса пăхса çитĕнтернĕ. Пурте çемьеллĕ.