07 ноября 2008 г.
Иртнĕ çулхи ноябрь уйăхĕнче Чăваш Республикин Президенчĕ Н. Федоров “Чăваш Республикинче ялти культура учрежденийĕсене аталантарас енĕпе пурнăçламалли мерăсем çинчен” Указ йышăннăччĕ. Унтанпа вăхăт самаях иртрĕ. Çак тапхăрта Трак енре те ырă улшăнусем пулса иртрĕç. Акă, Упи ял тăрăхĕнче ООО “Стройсервис” (ертÿçи В. Филиппов) ĕçченĕсем пулăшнипе Пайсупинти кану çуртне юсанă, сивĕсем çитиччен ăна газпа хутса ăшăтмалла тăвасшăн.
Упири кану центрĕ “Чăваш Ен культури” республикăри тĕллевлĕ программăна кĕрсе юлнă. ЧР Культура, национальность ĕçĕсен, информаци политикин тата архив ĕçĕсен министерствин комиссийĕ кану центрĕн ĕçĕпе пур енлĕн паллашнă. Каярах уписем конкурс комиссине тивĕçлĕ документсем тăратнă, унта çĕнтернĕ. Çапла вара кăçал Упири кану центрне 700 пин тенкĕлĕх тĕрлĕ оборудовани, костюмсем килмелле. Сцена тĕпрен çĕнелсе улшăнмалла. Иртнĕ кунсенче кану центрне компьютерсем килсе çитрĕç.